Genesis 48

Jacob Ephraim Manasseh ilak marak nungaram

1Tom udagi kariimet sang Joseph manorman, “Nika ba kuera ago bagoso,” maman. Se Joseph ko kuriang ilagala Ephraim Manasseh nunga giam ale ko nuet aringimonko arungak tairam.

2Se kariimet saki Jacob manorman, “Nika kuriang Joseph ka arigokko tairam,” maman. Se den mu ikiam ale numi tagi gurugumu laga barasu ko anira kuwim te daigam.

3Ale nu Joseph maonam, “Kaem Sokel Karogo wore Canaan sor te, wonong Luz (Bethel) mu te, agate aratam ale marak aisam, 4ale balam, ‘Ani kuriang suen biya kisekko,’ mam. ‘Se ka nimasari taleng girigir suen biya tala aratomon ale kariimet motam bibiya aratukko. Se ani ali imitang nungarik mu eng nononga.’ Kaem buta aninga maonam. 5Se ani nikate Egypt me tairem la, nika niwus kuriang kari ilagala nunga iluwam. Se kuriang ilagala umu Ephraim se Manasseh mu aninga, ani agata aga kuriang nunguning Reuben Simeon iwitata. 6Se nika kuriang udagi aratomon mu nika. Se ali tutera tom te mu kuriang udagi mu nunga laun ari Ephraim, Manasseh, nongote ali mel gimonko. 7Ani munan imi betesam mu nika niam Rachel ko ikia to se ani betesam. Tom ani Mesopotamia baga pelerem taikasam, mu nu lage luan te kueram, se ani mu ko ninguru aeman batagam. Nu Canaan kueram, tom ana Ephrath ko pingi nuam bagakasan. Se ani lage Ephrath namaram mu ko due te mutim tugumem.” (Ephrath mu ko nup bo Bethlehem.)

8Ale Jacob Joseph ko kuriang ilagala nungarkam ale isuam, “Imi awiri ko kuriang a?”

9Se Joseph balam, “Imi aninga kuriang, Kaem ani ewerete Egypt bagerem se aisam.”

Se Jacob balam, “Nunga gi arungu aningate tair se marak nungarikko,” mam. 10Jacob garukaram ale ko motam mel ninguru me arikaso. Se Joseph ko kuriang ilagala mu nunga giam arungu kote pingi nunga awuram, se nunga iluwam ale nogol misikiram. 11Ale Joseph iwita maonam, “Ani ulengkala ni me karkikko i makasam. Bare Kaem lage yawara nungam se ani ni karkem, ale ka kuriang ago nungarkem.”

12Se Joseph kuriang Jacob gomang te dagiman mu nunga giam ale ko nuet koma te tararam se moke ali ningi kaparam. 13Asele Ephraim mu Jacob kuting ngas ko mu te beteram, ale Manasseh mu kuting sengam mu te beteram. 14Bare Jacob kuting sengam mu gurugam Manasseh ko uria Ephraim ngas ko sanamiwaram mu supuling te beteram. Ale kuting ngas mu gurugam laun Manasseh sengam ko sanamiwaram mu supuling te beteram.

15Ale Jacob Joseph marak tuam, ale iwita balam, “Aninga angatak aga ait Abraham Isaac nunga Kaem, borta aninga sinar tam agarak tai tom imi te tai aratem, mu borta kuriang ilagala imi marak nungarukko. 16Se Kaem ko engel aninga bituam se ani memek me arigem mu marak nungarukko. Ani Jacob, se aga ait Isaac, se aga angatak Abraham nanga nainip nononga gue te anirukko. Se nunga kuriang, nunumas ari, taleng girigir suen biya aratomonko.”

17Bare Joseph Jacob ko kuting numi luan te supuram se kuriang nunga iluwam mu arigam, ale gomang ikuwakaso. Se nu nuet ko kuting sengam Ephraim supuling te aniram mu tam ale Manasseh supuling te bitirukko negeram, 18ale balam, “Ba, sumu diram mena. Kuriang laun ewere ko supuling te kiting sengam mu bitarko.”

19Bare ko nuet “Mena” mam, ale balam, “Aga kuriang, ani ikiwasam,” mam. “Manasseh ko kuriang imas ko gue te kariimet motam biya aratomonko. Bare ko uria Ephraim mu nu kiarukko. Noko kuriang imas nunga gue te kariimet motam suen biya aratomonko.”

20Ale Jacob tom mu te kuriang ilagala mu marak nungaram ale balam, “Udagi Israel kariimet nunga saki alo marak den nungaru se iwita balmonko, ‘Kaem Ephraim Manasseh nungumik te beteram turan nina ningimik te bitirukko,’ ma balmonko.” Jacob buta balam ale Ephraim gira maonam, ale udagi Manasseh maonam.

21Udagi te Jacob Joseph maonam, “Ikiko. Ani kuerikko tom pingi aram. Bare Kaem nengerak baga se nengerak peleruk ninga nenet nenengetak nunga ali te nengerak namurukko. Se ali ningo nunguningkiri, ani Amor arungu kagererem ale nongote taem, mu ni biya se ani kisisam, bare ani ali mu ka launuria me nungarikko.”

22